東瀛遊~東京迪士尼、小涌園、富士急樂園五天團... Day 2

12/10 (Wed)

今日嘅行程只有一個 --- DISNEYLAND
9點鐘前已經到咗Disneyland等排隊入場. 雖然係weekday, 但係都有好多日本人嚟玩, 通常都係一家大細或者係學校旅行.
入場前, 阿領隊哥哥已經派好晒入場卷同 1500 Yen Disney coupon (1000 yen - Mickey Mouse, 500 yen - Donald Duck). 啲coupon好靚, 我唔捨得用.
入咗場, 見到門口已經有Mickey & Minnie企咗响度同人影相, 仲排晒長龍, 不過啲日本人係自動自覺排隊, 唔似香港咁有人打尖.
領隊哥哥之前已經有介紹邊個game好玩, 包括space mountain, 巴斯光連... ...等等. 入埸後 領隊哥哥先帶我地睇"微縮世界"(即要帶3D眼鏡睇果啲), 然後帶我地去space mountain攞fast pass. 因為要陪媽咪, 又冇熟人同我一齊玩, 所以冇去攞fast pass. 因為仲有一pair母女都係唔玩, 所以我地齊齊去鬼屋攞fast pass. 跟住我地去咗睇"世界真細小", 即坐住隻船睇啲木偶著唔同國家,民族嘅服飾同你打招呼. 最搞笑係一隻船可以坐15人以上, 超多人排緊隊, 但係工作人員問完我地有幾多人(5個人), 指咗我地上船後, 就冇再指人上我地隻船, 即係話我地5個人包咗隻船住. 真係嘥晒啲位!
玩完次後差不多12點, 去咗食lunch. 因為之前有個同事話Disney啲粟米湯好好味, 所以我買咗嚟試驗! 排隊排咗半個鐘先買到個lunch, 我叫咗"照燒汁鷄飽", 粟米湯, 烏龍茶. 個粟米湯又真係好好味! 差不多吔完個"照燒汁鷄飽", 就聽到有音樂聲, 原來係Halloween巡遊. 之前仲以為啲日本人11點幾晨咁早鋪晒席响地下等2點半巡遊, 原來係等呢個巡遊. 巡遊隊伍未到之前已經有工作人員教人做動作, 等陣可以一齊跳.
完show之後, 去咗城堡影相, 跟住同Casper版嘅Mickey & Minnie影相, 再跟住影埋Halloween版南瓜車, 車上有Mickey+Minnie+Donald, 好靚呀! 影完相就去搵有樹蔭嘅位等兩點半巡遊. 睇完後就四周圍行, 買吓嘢, 食吓小食. 差不多到4點9就行番去鬼屋, 因為之前攞咗fast pass. 個鬼屋ok, 唔係咁恐怖. 玩完出嚟, 鬼屋出口個位置隔離剛剛係巡遊starting point, 所以順便霸頭位睇第二次Halloween巡遊. 之後同另一pair母女一齊去咗坐火車, 遊輪, 食住dinner等7:35晚間巡遊. 等緊期間, 我走咗去crazy shopping. 個晚間巡遊同下午果個好唔同, 靚好多. 完咗巡遊, 仲有半個鐘放煙花. 哈哈! 我又親呢段空擋走咗去crazy shopping! 9點鐘, 大家都好準時上車番酒店. on the way去酒店途中, 領隊叫咗司機先車我地去一間便利店買定宵夜(杯麵). 之後我地就向住係呢5日之中住得最豪華, 間房最大, 位於橫濱嘅"太子酒店"進發! 我地住個間房仲有海景睇tim! 好"正"~